Дархан-Уул аймагт энэ сарын 2-ны өдөр нэг хүүхэд менингококкт халдвараар өвчилсөн бол, маргааш нь буюу гуравдугаар сарын 3-нд Ховд аймгийн Жаргалант суманд мөн уг халдварын нэг тохиолдол лабораториор батлагдсан талаар Халдварт өвчин судлалын үндэсний төвөөс мэдээллээ. Халдвар бүртгэгдсэн аймаг, сумдад шуурхай хариу арга хэмжээ авч, тандалт судалгаа хийх, ойрын хавьтлуудыг тогтоох, урьдчилан сэргийлэх арга хэмжээг зохион байгуулж эхэлжээ.

Менингококкт халдвар нь богино хугацаанд хүндэрч болзошгүй, аюултай халдварт өвчинд тооцогддог. Ялангуяа нярай болон бага насны хүүхдэд өвчний явц хурдан хүндэрдэг онцлогтой. Бага насны хүүхдэд дараах шинж тэмдэг илэрвэл яаралтай эмнэлгийн байгууллагад хандах хэрэгтэй. Үүнд:

• 38 хэмээс дээш халуурах
• Уйламтгай, тайвшрахгүй болох
• Хөхөө муу хөхөх, хоолонд дургүй болох
• Бөөлжих
• Нойрмоглох, сульдах
• Арьсан дээр ягаан, хөхөвтөр жижиг цусархаг тууралт гарах (даралтаар арилахгүй)
• Нярай хүүхдийн толгойн зулай товойх
• Гар, хөл хүйтэн болох
• Таталт өгөх

Мэргэжилтнүүдийн хэлснээр тууралт эхэндээ жижиг цэг хэлбэртэй гарч, богино хугацаанд томорч, биеэр тархах боломжтой байдаг. Менингококкт халдвар нь цаг, минуттай уралддаг өвчин тул эрт оношлуулж, эмчилгээг шуурхай эхлүүлэх нь амь насыг аврах чухал ач холбогдолтой. Өвчний үед гэнэт 40 хэм хүрч өндөр халуурах, халуун буурахгүй байх эсвэл буусан ч богино хугацаанд дахин нэмэгдэх шинж илэрч болно. Мөн хүүхэд гэрэлд мэдрэг болж, уйланхай, нойрмоглосон байдалтай болдог. Халуурч эхэлснээс хойш 6–12 цагийн дотор тууралт гарч эхлэх нь элбэг бөгөөд ихэвчлэн доод мөчнөөс эхэлдэг байна. Эцэг эхчүүд тууралт дээшилж эхлэх үед анзаардаг ч энэ нь өвчин аль хэдийн хүндэрсэн байж болзошгүйг илтгэдэг. Мөн “цагаан халууралт” гэж нэрлэгддэг шинж илэрч болох бөгөөд хүүхэд өндөр халуурч байгаа ч гар, хөл нь хүйтэн байх нь өвчин хүндэрсний дохио юм. Ийм тохиолдолд яаралтай эмнэлэгт хандах шаардлагатай.

Энэ онд бүртгэгдсэн нэг нас баралтын тохиолдолд хүүхэд цагаан халууралттай байсан бөгөөд гэртээ 10 гаруй цаг болоод эмнэлэгт хүргэгдсэний дараахан нас барсан харамсалтай тохиолдол гарсан байна. Иймд эцэг эх, асран хамгаалагч нарыг хүүхдийнхээ биеийн байдлыг анхааралтай ажиглаж, дээрх шинж тэмдэг илэрвэл өөрсдөө эмчлэх гэж оролдохгүйгээр яаралтай мэргэжлийн эмчид хандахыг мэргэжилтнүүд зөвлөж байна.

ХӨСҮТ-ийн Томуугийн төвийн дарга Ч.Уртнасан "Энэхүү халдвар нь амьсгалын замаар дамждаг. Тиймээс урьдчилан сэргийлэх бүрэн боломжтой. Хоолой, амаа зайлах, гараа тогтмол угаах, гадуур хувцсаа сольсны дараа бага насны хүүхэдтэй харьцах, оргил үед нь хүүхдийг шаардлагагүй бол олны газар авч явахгүй байх нь чухал. Хэрэв хүүхдэд халуурах, ханиах зэрэг шинж тэмдэг илэрвэл цэцэрлэг, сургуульд нь явуулахгүй, заавал эмчид үзүүлэх хэрэгтэй. Зүгээр халууны эм уулгаад явуулах нь бусад хүүхдийг эрсдэлд оруулж болзошгүй. Эцэг эхчүүд анхааралтай, хариуцлагатай байх нь хүүхдийнхээ болон нийгмийн эрүүл мэндийг хамгаалах хамгийн чухал алхам юм" гэлээ.