Сүүлийн жилүүдэд Улаанбаатар хотын орон сууцны зах зээлд үнийн өсөлт тогтвортой үргэлжилж, нэг метр квадрат талбайн дундаж үнэ таван сая төгрөгт ойртжээ. Үндэсний статистикийн хорооны мэдээллээр 2026 он гарсаар нийслэлийн хэмжээнд орон сууцны үнэ өмнөх оны мөн үеэс 12.6 хувиар өссөн байна.

Шинэ орон сууцны үнэ

2026 оны нэгдүгээр сарын байдлаар дүүргүүдээс Сүхбаатар дүүрэгт шинэ орон сууцны үнэ хамгийн өндөр байгаа бөгөөд нэг мкв нь дунджаар 6.1 сая төгрөгт хүрчээ. Харин Баянзүрх дүүрэгт шинэ орон сууцны үнэ он гарсаар 18 хувиар өсөж, нэг мкв талбайн үнэ 730 мянган төгрөгөөр нэмэгдсэн нь дүүргүүдээс хамгийн өндөр өсөлтөд тооцогдож байна. Үүний зэрэгцээ Сонгинохайрхан дүүрэгт өсөлт харьцангуй бага буюу 0.7 хувьтай байна.

Хуучин орон сууцны үнэ

Зөвхөн шинэ орон сууц бус, хуучин орон сууцны үнэ ч мөн өсөлттэй хэвээр байна. 2026 оны нэгдүгээр сарын байдлаар хуучин орон сууцны нэг мкв талбайн дундаж үнэ 4.9 сая төгрөг болжээ. Байршлаар нь авч үзвэл мөн л Сүхбаатар дүүрэгт хамгийн өндөр буюу 5.8 сая төгрөгийн үнэтэй байна. Харин Хан-Уул дүүрэгт хуучин орон сууцны дундаж үнэ өмнөх оны мөн үеэс 16.5 хувиар өсөж, нэг мкв талбайн үнэ 780 мянган төгрөгөөр нэмэгдсэн нь онцлог үзүүлэлт болж байна.

Түрээсийн зах зээл

Орон сууцны борлуулалтын үнийн өсөлт түрээсийн зах зээлд ч нөлөөлжээ. 2026 оны нэгдүгээр сарын байдлаар нэг өрөө орон сууцны сарын дундаж түрээс 1.3 сая төгрөг, хоёр өрөө орон сууцных 1.87 сая төгрөг, гурван өрөө орон сууцных 3 сая төгрөгт хүрсэн байна.